السلام عليكم ورحمه الله وبركاته
فلانتين 2011 في ميدان التحرير
فلانتين مش زي ماهو معروف عند ناس كتير , وان كل حبيبين بيحتفلو بيه والكلام ده كله
انا لاول مره بشوف فلانتين بالطريقه دي
حاجه من نوع تاني تماما .... مش شاب بيحب بنت
او راجل بيحب مراته
لا لا لا خااالص .... ده شعب بيحب بلده
مصري ومصريه بيحبو بلدهم
عشق من نوع خاص في ميدان التحرير ... حب لم اره من قبل في عين اي من شباب بلدي
شباب وبنات قررو يعشقو مصر بطريقه مختلفه ماحدش شافها قبل كده
ميدان التحرير اللي كانت من اسبوع او 10 ايام كله متظاهرين وناس وفي حجاره مرميه , وورق مرمي هنا , واشياء منثوره هناك
في اليوم ده كان حاجه تانيه تماما ... كان فيه نفس الشباب اللي ثارو عشان بلدهم
لاكن كانو فيه المرادي عشان يحبو بلدهم وينظفوها ويجملوها
مجموعه من الشباب والبنات ... الكبار والصغار
تطوعو لتنظيف ميدان التحرير ... اعاده طلاء الارصفه , الحواجز الحديديه ... الخ
وكلهم متطوعين بأنفسهم ... ماحدش داعمهم ... هما جابو المعدات على حسابهم , واشتغلو بأيديهم
مش عشان حاجه ... عشان مصر وبس
مش بس كده ... الاشارات في ميدان التحرير , ميدان طلعت حرب ... وكذا مكان في وسط البلد ماكانتش شغاله
والمفاجأه انه ماكنش بس عساكر اللي واقفين على الاشارات بينظمو المرور
ده كان شباب عادي جدا واقفين بيتعاونو سوا على تنظيم المرور
وتسهيل حركه السير عشان ماتحصلش اي ازمه ... بجد شباب رائع ومافيش زيه بجد ...
وكان في كمان مفاجأه
مجهود شخصي برضو من شباب
عاملين زي نصب تذكاري للشهداء
فيه صورهم ... واساميهم
وحاطين جمبهم مصاحف ... ومزينين النصب بالورود والزينه
بجد شيء مبهر ...
وهما دول بجد شباب مصر اللي فيهم الخير ... اللي خايفين على بلدهم وعاوزينها بأفضل صوره
ربنا يحميكي يامصر ... ويحمي كل اهلك وناسك :)
المصدر : مما قرأت واعجبني
